Sa lìngua, in Sardigna, est un'argumentu chi fàet discutire meda. Is partziduras (maladia sarda chi at fatu e sighit a fàer medas disacatus, a totu is livellus) esistent fintzas in custu argumentu. De "foras" cun probabilidade s'ant a fàer duas pregunteddas in su pro ite sighimus a nche dividire fintzas subra chistiones base comente a sa lìngua, e de sa Sardinnia, sa respusta, non acudit a arribbare. Sa fràsia chi arregollit prus pagu sa "farsa divisonera" est custa: "ma cale sardu?". Est custu chi trìsinat medas sardus in su sighire a pensare chi in Sardinnia bi siant duas "lìnguas" sardas, e chi portat medas a nàrrer "no cumprendu nudda de su chi est narende". Deu no seu unu linguista, ma potzu in manera chieta nàrrer chi totu custas diferèntzias intre is duas majores variantes de sa lìngua nostra, in realidade, no bi sunt. Certu, mancari carchi fueddu est diversu, is desinèntzias càmbiant, ma is fueddus, is règulas grammaticales, is règulas de sa sintassi, funt uguales in totu sa Sardigna. Chie sighit a giùghere dae in antis una polìtica divisonera in sa chistione "lìngua sarda" no ischit bene ca su fatu chi unu pòpulu, chena limba, est destinadu a mòrrer, opuru ischit bene chi eliminende sa lìngua s'elìminat cudda identidade, tantu atacada in sos sèculus, chi diat pòder fàer "male" a calicunu, ma meda bene a sa Sardigna. In sos annus b'at chie s'est adobbadu pro torrare su sardu a una lìngua "normale", chena is vàrius ratzismus a cale est istada sutaposta in sos ùrtimus de dexe annus. Unu de is resurtadus de majore ispico est sa LSC (Limba Sarda Comuna), chi at fatu discutire meda, ma chi, a oe, abarrat s'ùnica solutzione pro istandardizare su sardu. Certu, mancari si diat pòder fàer carchi muda, ma non istat a mie pònner in discussione sa LSC, fintzas pro ite, carchi borta, dda imperu fintzas deu (cun cancuna modifica).
Immoe bòllu tocare unu àteru puntu meda de importu pro sa supravivèntzia de sa lìngua nostra, chi s'istèsiat in manera lèbia de cuddu iscritu subra: su tassu de alfabetizatzione scandalosu presente in Sardinnia, pro cantu riguardat sa lìngua nostra. Est beru chi in is iscolas, su sardu, est istadu in manera rara insenniadu, antis, s'est vedadu pro medas annos, ma custu no giustìficat a prenu su fatu chi 2/3 de is sardus no ischint iscrìer in manera curreta in sardu (statìsticas fintzas tropu bonas). Deu, fintzas un'annu fàet, no ischia iscrìer in manera curreta in sardu, e facebook, cun is arregordus, mi ddu fàet notare donnia die. Gràtzias a numerosas pàginas e video in youtube, intru de pagu tempus apu imparadu cussas pagas règulas fundamentales chi mi ant permìtidu de iscrìer curretamente in sardu. A suta ap' a linkare una pàgina meda ùtile, chie boleret podet andare a dare una càstiada.
Totu custu minestrone pro arribbare a un'afirmadura chi cuntenit totu, e chi rapresentat unu puntu fundamentale pro s'ìsula nostra: chena lìngua, no b'at natzione, pensade·nche bene...
Link pro sa pàgina facebook "Regulas de su sardu iscritu" https://www.facebook.com/regulasiscritu/?fref=ts
Link pro s'articulu in limba italiana http://sardignaterranosta.blogspot.it/2017/03/parliamo-di-lingua-sarda.html
Iscusaemì si nc'est cancunu errori...
Commenti
Posta un commento