In precedèntzia aia faeddadu giai de sa "chistione" limba sarda. Craramente nudda est cambiadu (essende colados sceti pagos meses), antis, sa situatzione arriscat de peorare, e sa supravivèntzia de sa limba nostra est posta semper prus in perìculu. In Regione est istada presentada una proposta de lege chi previdet s'impreu de prus istandard iscritos, a segunda de sa variante dialetale chi s'at a andare a pigare in cunsideru. Si tràtat, tando, de una partzidura de su sardu chi, cun una lege, diat devènnere ufitziale, e chi diat batire a s'impossibilidade de istandardizare su sardu in manera ufitziale (esistende giai sa LSC e unas àteras propostas de istandard). C'at chi amparat custa proposta de lege, ma paret evidente chi s'arriscat sceti de fàghere mòrrere sa limba natzionale de sa Sardigna. Is portaboxes de su "ma cale sardu" diant sighire a giùghere dae in antis is teorias issoro, tra cale "is sardos non si cumprendent tra de issoro" e "non faghet a insenniare su sardu in is iscolas" (cosa chi faghet arriere, bidu chi su Làdinu, in Trentinu, est limba ufìciale insenniada in is iscolas, puru tenende a su internu suo numerosas variantes - su topònimu Bolzano est traduidu in bene 4 maneras diferentes!). Est importante torrare a nàrrere su cuntzetu: sa limba sarda necèssitat in manera assoluta de unu standard ùnicu ufitziale, e non faghet a sighire a dividire su pòpulu fintzas in sa chistione linguìstica. Un'istandard diat pòdere èssere sa LSC (giai impreada fintzas in Regione), ma finas issa necèssitat de carchi muda. C'est abbisongiu de un'istandard e de unu connoschimentu de sa limba, fintzas cun s'imponimentu, pro ite, arribbados a custu puntu seu arròscidu de lèghere infinitos errores ortogràficos in sardu, e de intendere fintzas chi sa variante campidanesa, iscrita a norma, paret nugoresu... sarvamus sa limba nostra, su benidore de sa Sardigna dipendet fintzas de custu, e unu pòpulu chena limba est destinadu a mòrrere.
Commenti
Posta un commento