De ite soe chistionende? Chie mi sighit in su profilu miu in Facebook (o chie mi connoschet in sa vida a fora de sa retza) ischit ca deo cando intendo o ligiu calchi cosa chi no mi andat depo respunder (a tono) semper. Oe mi soe agatadu a suta de is ojos mios un'àrticulu publicadu in unu giornale sardu (no scrio su nomene, ma bos naro chi est su segundu, pro grandesa, chi amus in Sardigna) ue si chistionaiat de "bier sa Sardigna chena ammanniare is cosas, chena si artziare a "superiores"".
Tando, deo chèrgio pentzare chi su giornalista apat scritu s'àrticulu cun bona fede, proite unas cantas cosa no si podent liger. Pro no m'allonghiare meda cun custu post, ap'a leare duos o tres puntos pro oberrer e analizare (segundu sa bisione mia) su dìscursu.
- "Is sardos si creent "superiores" e "ispetziales". Custa cosa mi faet pentzare meda. Est una distorsione manna de unu problema chi corpit sa mentalidade de is sardos in generale. Cando mai nos semus intendidos "superiores"? Semus crèschidos cun una bisione de Sardigna totalmente cunfundida, nos ant fatu creer de esser "inferiores", de no baler nudda, e immoe diamus esser noi cussos chi s'intendent ispetziales e superiores? Ma no mi faides rier.
- "Imbentamus "istorieddas" pro nos ìntender importantes". In s'àrticulu si pigant pro esempru is argumentos istoricos o geograficos prus connotos. Si andat dae sos Shardana fintzas a "su Gorropu", ponende in unu minestrone ùnicu cosas chi no b'intrant s'una cun s'àtera. Comente si podent leare pro fàulas cosas comente is Shardana, cun dexe e dexe annos de studios a is palas? Comente si podet pigare pro fàula su fatu ca Oetzi (sa mumia agatada in sas Alpes) tenet in su DNA gènomas de sardos antigos? Deo no naro chi totu cussu chi bessit est sa beridade, ma no si podent faer a "brullas" totu custas cosas.
- Su puntu prus de importu est cussu: si faet cunfusione intre "superioridade" e "ugualidade". Comente apo giai scritu is sardos sunt crèschidos cun unu cumplessu de inferioridade mannu a beru, chi nos at fatu disacatos medas, in totu is campos (deo dongio sa curpa de sa situatzione male posta de sa Sardigna a unu fatu culturale, pustis ap'a ispegare puru custu). Pigo comente esemprus sa storia e sa lìngua sarda: custas duas chistiones sunt istadas cas cantzelladas dae su cherbeddu de sa prus parte de is sardos, mescamente gràtzias a sa scola. In sos ùrtimos annos (mancu male) est crèschida sa cussèntzia in sa gente, unu pagu de mancu in sos giòvanes (ma si mi soe ischidadu unu pagu deo, lu podent fàer totus), e custu at portadu a unu interessu prus mannu pro sa lìngua (si biet meda prus gente chi scriet in sardu, mancai no meda bene) e pro sa stòria. Custa ischidada est istada leada, a parre miu, unu pagu male, e duncas sunt crèschidos is chi donant un'immàgine farsa a is cosas interessadas.
Su miu no est unu àtacu, ma una simple rexonada. Ispero chi no bèngiat lèada male.
Commenti
Posta un commento