Salude a totus, sa pàgina de su blog est una cosa “noa”, ma su blog est nàschidu in su 2015, cun su nomene “Sardigna Terra Nosta” (a sa casteddaja), in su tempus at mudadu nomene, prima in Sardigna (custu est galu s’uficiale), pustis in “su Blog de Lìsandru” (Lìsandru est Alessandro in lìngua sarda).
Proite apo creadu custu blog? In su 2015 fia intradu giai in sa mentalidade “indie” (comente si narat intre is giovunos), e mi mancaiat unu logu chi no esseret facebook pro scrier is pensamentos mios a pitzus de unos cantos argumentos chi arreguardant su mundu indipendentista e s’universu Sardigna in generale. Su blog est istadu una manera pro megiorare (mellorare) su sardu scritu, e fintzas cussu fueddadu. In su 2015 no ischia mancu ite fiant is règulas de su sardu, e duncas, ponende mente a unas cantas pàginas de sardu in facebook, apo cummintzadu a scrier (prima sceti in su dialetu miu, pustis fintzas in LSC, e imoe in unu sardu “mesanu” chi leat in cunsideru prus propostas de sardu uficiale, chena intrare in is chertos de sa gente). Sa bìdea fiat cussa de scrier in italianu e sardu, ma cun s’andada de su tempus apo lassadu s’italianu pro scrier sceti in sardu. No est “ràtzismu” contra sa lìngua italiana (est semper sa segunda lìngua mama nostra), ma, in manera simple, unu bìsongiu de ponner in primu pranu sa lìngua sarda, ca s’italianu ddu impreo giai tropu... In unu primu momentu, cando apo cummentzadu a m’interessare de polìtica, m’est praxidu su Movimentu 5 Stelle, ma faende chircas in sa retza subra sa storia e sa cultura sarda, cummintende a scrier in sardu, e commintzende a liger is rexones de s’indipendentismu, soe divenidu “indipendentista”, como fintzas natzionalista. Su miu no est òdiu in sos cunfrontos de is italianos o de su “Paese” Italia, ma òdiu contra a su stadu coloniale, chi at sighidu su traballu de sa Domo Savoia contra sa Natzione Sarda. S’indipendentismu miu no est de stampu “economicu” (o, a su mancu no est sceti cussu), s’indipendentismu miu tenet reixinas culturale, storicas, tenet reixinas de libertade pro su pòpulu nostru, e nudda podet comporare cun su dinari custa libertade (chi, pro imoe, mancat)
Bos apo “alloriadu” cun sa presentada, ispero chi bos praxat su progetu. Podides agatare su link de su Blog in presentada, o puru innoe a suta. A mèngius bier!
Commenti
Posta un commento