Apo
bòfidu donare custu tìtulu a su post “pre-eletorale” mescamente
pro ponner a craru ca nois, sardos, su 4 de martzu, amus a poder
scioberare. Ma ite? Nois, su domìnigu chi benit, amus a poder
scioberare s’arruga in diretzione de sa libertade, o s’arruga in
diretzione de su tzerachismu.
Comente
apo fatu pro su referendum de su 4 de Nadale 2016 ap’a presentare
is motivatziones mias chi m’ant portadu a faer su scioberu chi apo
fatu, e duncas no at a esser unu post pro “cunvincer” sa gente a
votare unu partidu o unu movimentu.
Chie
mi connoschet ischit cal'est su pensamentu polìticu miu, e duncas no
tenet abbisòngiu de acrarimentos (o fortzis eja, dipendet), ma pro
is pagos chi ant a liger custu post chèrgio faer duos apuntos.
Unu
programma polìticu, pro praxer a mie, depet aer a s'internu suo unu
puntu fundamentale, cussu chi arreconnoschet su deretu de is pòpulos
a s'autodeterminatzione. Chie no arreconnoschet custu, politicamente,
no podet òtenner su suportu miu.
Craramente
nisciunu de is partidos italianos presentes a is eletziones tenent a
coro custu puntu. Custa borta, però, tenimus una possibilidade de
scioberu. Custa borta unu partidu (coalitzione) de stampu
indipendentista est presente a is eletziones. No est su Partidu Sardu
(Psd'Az), est su Progetu AutodetermiNatzione, una coalitzione chi
regollet a s'internu suo 8 partidos indipendentistas e autonomistas
(no ap'a scrier is nomenes pro comodidade). Una cosa noa in su
panorama polìticu sardu, difatis mai, in sa storia de
s'indipendentismu, is partidos si fiant unidos pro currer a is
eletziones.
No
essende, su miu, unu “spot” eletorale, no apo a scrier nudda de
su programma (però ais a poder agatare su link a suta), ma sceti su
“proite” deo ap'a votare PA. De su puntu “autodeterminatzione
de is pòpulos” apo scritu bastante, imoe arribbant is àteros
puntos: lìngua e cultura sarda. Custos sunt argumentos chi tèngio
in su coro, proite, pro mie, sunt sa base de sa nàschida de una
cussèntzia natzionale sarda noa (innoe ais a poder agatare su link
de s'articulu miu a pitzu de custu argumentu
http://sardignaterranosta.blogspot.it/2018/01/una-cussentzia-natzionale-pro-torrare.html
).
S'insenniamentu
de sa storia e de sa lìngua sarda sunt sa base pro sa creatzione de
una generatzione ( antzis, prus generatziones) chi tengiat su sentidu
de esser “sarda” e no “italiana de serie B”. Una bisione unu
pagu natzionalista, ma deo soe natzionalista, e no tèngio bregungia
de ddu narrer.
Est
unu pagu difitzile chistionare de una bìdea de votu chentza ponner a
su centru su programma de sa coalitzione, ma custa borta no bos potzo
presentare un'argumentu comente apo fatu pro su referendum
costitutzionale de su 2016, ma sceti sa parte de sa “voluntade”
mia.
Si
bolides ais a poder liger su programma innoe:
http://www.autodeterminatzione.it/programma-in-sardu/
Torro
gràtzias a is chi ant a liger, e torro a narrer chi no ddu fatzu pro
dinari (craramente), ma pro passione. Andade a votare, ponide una
cruxe ue bolides, ma VOTADE!
Commenti
Posta un commento