Impressiones

Oe, pro sa prima borta, ap'a chistionare de su chi riguardat su guvernu italianu, cun impressiones dae indipendentista e natzionalista sardu. Foras de sa retza nd'apo giai faeddadu meda (fintzas tropu), ma semper che a unu citadinu foresu (e, pro cantu riguardat sa natzionalidade, est gasi), comente chi esseret faeddende de cale si siat Stadu europeu. 

A parte sa bisione "indie" de sas cosas, a dolu mannu faemus parte (politicamente) de su Stadu italianu, e duncas, su chi sutzedet in Roma, unu pagu nos arreguardat. 

No bos preocupades, sa mia no at esser una anàlisi polìtica (no soe galu in gradu de nde poder faer una), ma unu parre simple subra su chi, segundu a mie, at a mudare pro sa Sardigna.

A is eletziones nos semus unu pagu "illudidos" de poder aer, a su mancu, unu parlamentare o unu senadore indipendentistas in sos palatzos de su guvernu, pro faer presente, o mègius, pro faer "casinu" a pitzus de chistiones chi pro nois sunt de importu mannu (bases militares, disocupatzione, emigratzione, vertentzia intradas, continuidade territoriale, autodeterminatzione de su pòpulu sardu etc etc), ma, a dolu mannu, nos agatamus cun nemos chi at a gherrare pro custas cosas, antzis, is prus ant a esser a su costadu de su guvernu italianu. 

Duncas custa cosa, segundu mie, est giai unu puntu a sfavore pro nois. 

Pro nois, sardos, ite at a mudare in beridade? Semper a parre miu, nudda. M'ispiego. Prima de totu su cambiamentu, pro sa Sardigna, at a poder arribbare sceti cun, a su guvernu regionale, unu partidu indipendentista forte, unu fronte unidu contra su stadu italianu, ma custu est unu discursu prus mannu, de afruntare in unu post a parte.
Segundu bos àteros custu guvernu nou ant arribbare bonas noas pro sa Sardigna? At a mudare calchi cosa in su fronte de s'ocupatzione militare? At a mudare cancuna cosa in su fronte de sa continuidade territoriale? At a mudare cancuna cosa dae su puntu de bidida ocupatzionale? Bos respundo deo: NO. 
No naro custas cosas pro esser semper su pessimista de turnu, in manera simple custu guvernu est sceti su sighidu de cussos chi lu at precedidu. Unu guvernu non podet mudare una situatzione de colonialismu chi durat dae sèculos, unu guvernu (cun a s'internu suo gente chi tenet bìdeas chi no podent faer abarrare tranchillu nemos) no podet mudare su Stadu. 
A su Stadu italianu, de sa Sardigna e de is sardos no ddi nde importat nudda, e mi dispraxet pro chie donat galu fidùcia a cussa gènia, mi dispraxet pro chie pensat chi su sarvadore at arribbare dae unu Paese istràngiu. 
Pro sa Sardigna cummentzant àteros 5 annos de colonialismu, legitimadu dae su votu de is sardos, a dolu mannu. 

Semper pro faer su pessimista, s'annu chi benit nche ant a esser is eletziones natzionales sardas, e, cun meda probabilidades, ant a bincher is partidos foresos chi oe sunt a su guvernu italianu, e is annus de colonialismu chena resistèntzia istitutzionale ant a divenner 6, e mi paret superfitziale scrier is motivatziones.

Nos serbit una bella rivolutzione, mescamente culturale, chi diat faer ischidare is sardos dae custa "apàtia", chi nos faet abarrare prisoneris de polìticas coloniales, cun s'agiudu de is funtzionarios coloniales indìgenos.