In custos ùrtimos meses sa scola e s'universidade ant dèpidu rugrare (attraversare) unu perìodu tostu meda. Pruschetotu s'universidade est bivende una situatzione difìcile, chi biet in dificultade studiantes meda.
In summa, dae su mese de martzu, pro more de s'emergèntzia coronavirus, su guvernu italianu at tancadu, paris a totu is atividades, fintzas sa scola e s'universidade. A bellu a bellu custas duas istitutziones si sunt unu pagu arrangiadas, cun sa didàtica a distàntzia, ma cun medas problemas a coa. Sa didàtica a distàntzia at postu antis de totu su problema de disparidade intre is piciocas e is piciocos chi studiant. In medas, pro tempus meda (e fintzas a immoe puru) no ant tentu a dispositzione is mezos pro sighire is letziones e studiare in domu, pro more de medas problemas chi pertocant medas famillias.
B'est istadu, e b'est ancora chie no tenet unu computer o una cunnessione a sa retza no sceti pro sighire is letziones, ma fintzas pro sustenner is esamines.
Innoe, però, tocat a faer una distintzione intre scola e universidade: sa scola at belle acabbadu s'annu scolasticu, e is istudiantes de sa classe de 5 superiore ant a faer s'esamine cara a is professores (duncas chene internet). A s'universidade is cosas mudant, ca is esamines ant a essere, a su mancu pro sa sessione de s'istadi, in bia "telematica".
Pro cantu reguardat s'univerdidade, potzo chistionare sceti de cussa de Casteddu, e sa situatzione est cussa chi apo scritu a pitzus: esamines a domo.
Innoe, craramente, naschint prus chistiones: in medas no ant a poder faer is esamines pro problemas de cunnessione e de mezos, àteros tenet dificultade a studiare in domo, e cun is bibliotecas galu serradas no nche sunt medas solutziones.
Su deretu a su stùdiu est minetzadu ancora de prus respetu a sa normalidade, sunt bènnidos a sa superfitzie medas cosas chi no funtzionant a intro de su mundu de s'istrutzione (ma no sunt cosas noas, de s'ispantare, pro chie nche bivit e traballat in custu ambiente).
Pro cantu mi reguardat, apo tentu e soe tenende dificultade meda a mi ponner a studiare, e s'esperientzia mia cun sa didàtica a distàntzia si podet definire lègia meda.
Commenti
Posta un commento